郭志仁 - 十四楼有女鬼 | 九宫格
郭志仁
2024-09-20 02:00 HKT
字體大小
音乐人T先生在坏男群组分享一则「鬼故」，源自屋苑大堂保安员跟女住客对话。十四楼女住户惊惶失措，走到保安员身边，女︰「你最近夜晚巡楼，去到我𠮶层，有冇听到高踭鞋声？」保安︰「十四楼？唔觉㖞，喂，你唔好吓我呀。」
女︰「你知我系法团成员，同邻居都熟，平时冇人会晚晚凌晨出街。但呢两个礼拜，每逢凌晨一点左右，就听到有开防烟门声，跟住就有高踭鞋脚步声。」保安︰「凌晨一点……哦，我估到系咩事。」
保安员示意十四楼女住户靠近一点，T先生扮作检查信箱邮件，继续偷听鬼故结局。保安︰「你识唔识十五楼X先生，之前都做过法团。」女︰「做时装生意𠮶个？」保安︰「系呀。佢哋两公婆住，最近太太好似去公干，我有晚见到X生同个女仔入大堂，但就扮唔识，唔讲嘢又分开䢂搭，女嘅就去你𠮶层。最近夜晚个女仔都喺十四楼走。」
女︰「哦，好彩唔系女鬼。唔怪得有开防烟门声啦，原来佢晚晚都由楼上落嚟搭䢂走。」偷情男女都爱自欺欺人，以为前后脚分开电梯就平安无事。
屋苑保安员跟公司秘书一样，精通住户背景行踪，若要人扮不知，平日就好好跟保安建立良好关系，值得长线投资。
「我很关注琐碎事情，以X光眼睛，把你灵魂望到很透明」林家谦 — 难道喜欢处女座
郭志仁
最Hit
更多文章
