KellyChu - 首批外籍港人领通行证 携妻女玩番转 奥商会前成员大赞北上消费又平又好 | Executive日记
KellyChu
2024-08-05 02:00 HKT
字體大小
居港22年嘅奥地利商会前委员会成员Alfred Buchner，成为首批持通行证北上嘅外籍港人。佢上周末携同太太阿囡去深圳一日游，大赞自助过关快捷方便，形容政策嘅一小步，系连接交流嘅一大步，又指深圳有好多新落成建筑，饮茶埋单只系香港一半价钱，服务员态度良好，未来计划去更多内地城市旅游。
非中国籍嘅香港永久性居民上月起已可申请通行证，Alfred为方便来往香港同内地工作，成为首批攞到通行证嘅外籍港人，佢亦跟随港人潮流，体验北上消费。
Alfred大赞自助过关时，系统识别出佢嘅国籍改用德文显示，印象深刻，过程只系用咗约5至10秒，而以往过关至少要半个钟。佢话作为商人经常要用签证好唔方便，现时用通行证容许逗留90天，无论系商务定旅游都好方便，赞同政策嘅一小步，系连结交流嘅一大步，身边唔少朋友都向佢哋请教办理流程。
佢哋一家三口到埗后先去咗饮茶，表示埋单300蚊，价钱系香港嘅一半，仲食得好饱，有好多未见过嘅点心。虽然服务员唔识英文，但主动提供英文餐单及接受信用卡付款，态度良好。Alfred亦指，事隔7年冇去深圳，感受到好大变化，例如口岸外面有多幢新落成建筑。
17岁女儿Patricia Buchner就第一次去到内地，认为当地人唔习惯用英文交流，而自己只系识「少少中文」，所以沟通冇香港咁方便，但强调唔影响整体体验，指内地嘅商场比香港大，可以玩足一日。
KellyChu
最Hit
更多文章
