古星辉 - 5G体坛盛事连连 | 乜都5G
5G高速低时延，用于关键任务、救急扶危，当然无懈可击，而应用喺讲求速度嘅体育盛事，一样锦上添花。
试谂吓，边个入球先，边个冲线先，有时真系千钧一发，虽然目前已有好多先进设备，可以帮裁判作准确决定，但5G喺体坛嘅应用仍然有好多空间。
最近板式网球大满贯就成功喺香港举行，吸引咗来自世界各地嘅队伍同选手参加，人数创新高。公司把握机会，为呢个首次喺香港举行嘅大赛担任5G流动网络合作伙伴。
好多人未必听过板式网球呢种运动，佢可以话系羽毛球、壁球及网球嘅混合体，据讲𠵱家喺欧洲除咗足球外，系第二受欢迎嘅球类运动。
赛事喺西贡嘅户外场地举行，要主办方为咗一两日嘅赛事而申请拉线真系唔容易，呢个时候5G流动网络正正能发挥作用！我哋喺赛事期间，为大会提供专属5G流动通讯服务，等大会可以即时即场应用俗称「鹰眼」嘅视像辅助球证（VAR）系统，有助提升裁决嘅精准度及球迷体验。
助板式网球大满贯举行
今次将5G应用喺本地体育赛事，可以话做咗一次好好嘅示范。5G应用可以有几广泛，视乎大家几有创意。
上周本港政府宣布购入巴黎奥运嘅转播权，今日已进入少于100日嘅倒数阶段。据讲今届奥运系首个采用电子数码门票嘅奥运会，而且系开幕式及比赛期间有好多地方会采用5G，例如支援为视障人士而设嘅平板电脑，等大家可以一同实时参与奥运。
据闻法国当地嘅电讯商，几年前已经开始喺唔同嘅奥运场馆加强5G网络覆盖，希望喺呢项国际盛事一展实力。就好似将会喺塞纳河畔举行嘅巴黎奥运开幕式，预期有30多万名现场观众参与，对于突如其来嘅海量数据需求，电讯商的确要早作准备。
另外，塞纳河畔本身系联合国教科文组织嘅世界文化遗产，要喺两旁加放电讯设备提升容量唔容易，电讯商为咗将各种临时电讯设备巧妙融入四周环境，大家都要各出奇谋。
对于未来喺本地或国际体育盛事加入更多5G元素，大家拭目以待！
和记电讯香港执行董事及行政总裁
古星辉
