古星辉 - 迈向5G智慧物管｜乜都5G

古星辉

2023-06-30 00:00 HKT

阅讀更多

內容

社会近期热切讨论有关输入外劳嘅安排，其中物业管理行业嘅保安及清洁职位极难请人。听讲出到好高人工都请唔到人「踢十二码」（物管术语：连续工作12小时一更），就算请到人都好快转工，市场求才若渴。

其实喺疫情期间，因为要减少人与人嘅接触，巿场已纷纷引入机械人帮手营运。好似喺购物商场就有服务大使机械人，食肆有送餐机械人，超市有清洁同消毒机械人等。机械人所带来嘅工作效益，渐为业界所认同，巿场更预期环球机械人嘅市场规模于2027年将超过433亿美元。

成日都话，今时今日嘅电讯商已经不限于提供流动通讯服务，我哋系一个「enabler」，一个喺5G世代促进各行各业数码转型嘅数码营办商。因此，当物业管理日益走向智能化，我哋梗系帮到手。
户外巡逻机械人将登场

最近，公司就帮一个超豪屋苑，重金礼聘咗刻苦耐劳、任劳任怨嘅「外劳」，专责屋苑嘅巡逻工作；返日更又得，夜更都得，随公司安排！佢就系物管业嘅新晋户外巡逻机械人！

呢位「专才」无论咩天气或环境，都可以正常执勤。巡逻路线由专人预先设定，可以游花园、行停车场或巡逻特定设施。

机械人身上预设咗人工智能视像监控系统，配备可360度摄录嘅镜头，如果喺巡逻时遇到突如其来嘅情况，例如有人或动物误闯屋苑禁区，就会发出警报，并立即摄录及将影像传送比控制室及当值同事；机械人可以用Wi-Fi连线，咁用超高速、低时延嘅5G当然更加配合物管智能化嘅趋势。呢位「专才」仲有一大优点，佢唔使放假，可以连续24小时定时巡逻，同埋自己返去叉电位叉电，唔会偷懒。听闻佢仲好少病，如果有乜头晕身㷫，香港嘅代理仲可以随传随到帮手维修。

户外巡逻机械人预计下个月正式返工，目前佢正喺原产地受训，由技术人员进行各种精密配置，希望好快喺香港见到佢。
和记电讯香港执行董事及行政总裁
古星辉