头条戏场 - 《无声绝境外传：首袭日》 世界末日又有咩好惊呀 | 头条戏场
头条戏场
2024-07-03 02:00 HKT
字體大小
《无声绝境》及《无声绝境II》全球票房大收逾6亿美元，成为惊栗悬疑电影的新经典。系列去到第3集，跟前2集一家五口完全冇关系，转为同首集一样时间线，即外星核突生物入侵地球的第1天，但从另一群在纽约生活的幸存者视角出发。影评一面倒狂插好闷、唔够惊吓，其实本身玩「唔想死咪出声」概念已经唔新鲜，《外传》玩末日情谊，一个癌末女加读law的惊青男逆着人潮在大城市废墟漫步，最重要末日降临仲可以养猫又可以互相救赎，惊吓度的确唔够前两集多，但非常温暖。（刚上映） 撰作为资深猫奴，一睇预告已经知道必须要入场，人类完全控制唔到BB同动物叫喊，续集见证过BB喊声嘅威力，猫叫亦可大可少，估计会吸引大量依靠声音猎食的外星生物埋身，相信全片紧张位亦同猫有关，入场后发现原来谂多咗，人生第1次睇文艺惊悚片，感受非常特别。
连猫都知道唔可以乱出声
全片重要人物，孤独癌末女诗人Samira（Lupita Nyong'o饰）跟一只猫Frodo住喺灵养院，因为好想食pizza走进市区，撞正外星生物随陨石跌落地球，好多人死，不断传出爆炸声，人人叫救命，吸音怪物兴奋地享受人肉放题，明明打头阵呢幕就好好睇，玩人体光影灰尘加突然无声，猫猫仲要被巨响吓亲跳走，稍为代入少少，恐惧感已弥漫全身。
电影冇一个坏人角色，个个守望相助。最特别惊青男主角Eric（Joseph Quinn饰）中途出场，虽然跟女主角萍水相逢，但末日面前互相支持，齐在暴风雨中大叫，更在黑暗中吟诗，甚至演奏不能发声的乐器，我觉得好浪漫。Samira本来就要死，人人想逃离市区，但佢选择逆着人潮返回已变废墟的出生地，在生命尽头好好跟自己及世界告别，如果世界已变烂，末日又有咩好惊？
头条戏场
男主角因为见到Frodo先跟女主角相遇，好彩世界上有猫。
Henri（Djimon Hounsou饰）曾出现《无声II》，当中讲述外星生物入侵时，他在纽约跟市民如何试图乘船撤离。
纽约市居民听到有逃生船即刻出晒嚟，怪物全部喺附近。
因为怪物怕水，政府为咗杜绝怪物四散，自私地烧桥。
呢幕地下铁逃亡超惊险，套戏点会唔恐怖呀？
男主角揽实只猫狂奔上船，你睇后面只嘢几黐线。
全靠女主角好坚强，男主角先有勇气生存落去。
Samira一身文青打扮在废墟放猫，反正都要死，冇所谓啦。
最Hit
35岁「多仔婆」女星罕谈性生活尺度惊人 大爆富商男友床上尴尬表现 自揭床事频繁非自愿
2025-11-15 10:00 HKT
TVB「未来视后」惊爆患病需中西合璧治疗 穿酒店拖鞋游街面壁行为怪异 曾自揭患惊恐症
2025-11-15 09:00 HKT
长者日2025｜50大餐饮合集优惠！快餐、酒楼优惠大合集！美心MX晚市75折／大家乐早市减$3／海港免茶钱
2025-11-15 17:00 HKT
更多文章
