《重慶森林》懷念在荷里活道夢遊的日子丨頭條戲場

更新時間：06:00 2024-05-13
發佈時間：06:00 2024-05-13

為紀念王家衛導演的得獎代表作《重慶森林》上映30周年，電影公司以4K修復版重映。之前只睇過DVD，首次在戲院睇，好震撼，年青時的梁朝偉如行走的大火力武器，眼神好可怕，火山級Flirt女技巧，我俾佢殺死咗1億次。然後，當年覺得王菲擅闖民居搞搞震好恐怖，重睇又完全推翻，𠵱家又覺得王菲那種「我愛你但唔關你事」的單純，好可愛好勇敢好鍾意。(已上映)撰文:廖思慧

最鍾意睇偉仔同王菲的互動，睇完好想去食一客炸魚薯條。

眼神殺傷能力非常強勁。

梁朝偉第一套拎金馬及金像獎影帝的電影，30年前嘅佢真係不得了。

好靚仔，要儲存。

故事講述警員223（金城武飾）及警員663（梁朝偉飾）先後失戀，一個唔肯面對現實，以為女友同佢講笑，一個選擇默默等待空姐女友回歸，然後前者流連在人來人往的小食店，每日都買一罐5月1日生日到期的菠蘿罐頭，又告訴自己若然生日那天，女友還不回來，就宣告這段戀情已經過期。至於後者，失戀選擇跟家中的死物對話，有一日發現王菲飾演的小食店店員阿菲(王菲飾)出現在自己屋企。

所有角色都好可愛
獨白是王家衛獨特的敘事模式，觀眾無從得知223、663、金髮女子(林青霞飾)及阿菲的背景，223和女友為何分手？金髮女子為何販毒？但從王家衛賦予角色的獨白，令觀眾知道角色的內心世界，未睇過的年青觀眾應該會睇得好過癮。另外，王家衛亦擅長用音樂講故事，我最愛的偉仔跟阿菲的一段夢遊式愛情，由The Mamas & The Papas的《California Dreamin'》貫穿，加上王菲主唱改編愛爾蘭樂隊The Cranberries名曲《Dreams》的《夢中人》，兩曲同樣跟夢有關，懷念兩人當年在荷里活道上發著的加洲夢。

見到戲中已成歷史的舊物感受好深，如Call機、電話亭、賣玩具的地舖、便利店可租錄影帶等。人大了自然明白，世界上，所有事物都會過期。