咪再发见家乡梦｜曾智华
更新时间：14:49 2025-08-05 HKT
发布时间：14:49 2025-08-05 HKT
发布时间：14:49 2025-08-05 HKT
字体大小
股市转趋活跃，由万四点升上两万五，揸咗实力股，尤其恒指中内地强势股者，不少已见家乡，这时，有两个现象涌现。
网上骗子再度活跃
一为网上骗子再度活跃，几乎所有名人个头像都被借来行骗，小弟哎呀算有少少知名度，当然中招，烦到抽筋。仅此公告：各位，我一世都唔会介绍人买「高息股」或「蚊型股」的，若见这类网页，必是行骗。
几年经验下来，报警有冇用？冇！第一，骗子多如恒河沙数，再多十万警力都无法处理，更重要，骗徒根本可能不在香港。所以，成年人，请学懂保护自己，若因贪心或无知而中招，无法，当交学费可也。
另外一种近日大为活跃的，正是「水鱼散户」蠢蠢欲动。呢类动物特色，为蚀完又蚀都唔长进，更不会退缩，一见股市开始旺，即又心口挂个勇字冲入市，呢类傻人，凡买多即绑，十次有九次永世冇机会见家乡。
朋友揸3只股难见家乡
同事「A佬」正是人办，近日不停约饮茶，要求问几只股点睇。俾佢烦到晕，推无可推，见一次啦。
「碌sir，我揸咗三只股，长年沉底，想知今次升浪，有冇机会升返家乡位呢？」我一睇，百分百死得，只好严肃直讲：「A佬，真系要坦白，无谓误导你。你老哥揸的三只股，虽然招牌人人都识，甚或大部分人帮衬过，但……斩缆啦，我肯定你一世都唔会见家乡㗎嘞，死咗条心把啦。」
A佬头耷耷哀鸣：「其实，我全部在佢最高位跌咗一半时才买入㗎，谂住有机会反弹，就算死，都唔会渣都冇吖，点知……」
各位，A佬买咗边三只呢？
（一）翠华餐厅集团（1314），历史高位接近6元，A佬3元买入，如今跌破2毫子。
（二）佳宁娜集团（126），历史高位接近4元，A佬2元买入，如今？跌剩1毫2，更罕有成交。
（三）莎莎国际（178），历史高位9元3角，A佬4元6角入，如今只剩6毫1仙。
点解几只股跌得咁惨？唔好问我。我只肯定A佬将一世无法再见家乡，唔忍痛斩缆，盏日日抌心肺。
资深传媒人 曾智华
