【头条独家】「隐世厨神」中秋节煮十道菜黎耀祥教你做节煮海鲜秘技

即时娱乐

更新时间：22:54 2020-10-08 HKT
发布时间：22:29 2020-10-08 HKT

黎耀祥于中秋节煮咗十道菜，黎太好有口福。

「视帝」黎耀祥原来系「隐世厨神」，每年嘅开年饭都由他主理，喺刚过去嘅中秋节，受限聚令影响只好留家同家人饭聚，黎耀祥由买餸到落厨，一脚踼煮十人饭，人人激赞好味道。祥仔分享大时大节买餸心得：「只要动动脑筋，就算系煮海鲜都可以提前一日买定食材，咁就唔使同人迫，又可以买平啲。」采访：方骞平摄影：谭壹致场地：培仔海鲜@奶路臣街、阿一海景饭店

祥仔煮紧韩式炆牛仔骨，隔离炉就煲紧靓汤。

呢个清酒牛油炒鲍鱼，隔住张相都流口水。

喺中秋节前一日，黎耀祥同太太Julia带埋《头条日报》记者直击他选购海鲜情况，两公婆相当有默契，黎太负责睇车，由「老细」黎耀祥自备冰袋出击，由于祥仔系熟客，老板好识做咁按他需要执啲正嘢，好似鲍鱼、大花蟹、花螺、皇帝斑及墨鱼胶等，仲自动自觉打折，祥仔逗留唔使十分钟就闪得。

祥仔好权威咁发表下厨心得：「正日买餸，尤其海鲜一定贵好多，有啲嘢可以整定先，新鲜鱼、虾急冻一日冇问题，雪晕花蟹后，预早蒸好做冻蟹；花螺就用辣酒煮，做定仲入味。」正日当日早上11点，祥仔开始动手，仲加码煲埋莲子茨实淮山花胶竹维鸡靓汤、蒸鸡、韩式炆牛仔骨、冬菇花胶煲、清酒牛油炒鲍鱼等共十道菜。问祥仔可有兴趣做烹饪节目？祥仔拒绝：「又唔得！我呢啲只系煮家常便饭，唔通炒碟菜都教人咩！之前请过郑嘉颖夫妇嚟食饭，嘉颖钟意食香口嘢，我整咗阿妈教落嘅葱虾煎蛋角、蒸条鱼，佢就食咗三碗饭，我谂只系啲餸好餸饭啫。」