胡慧冲 - 肥黑师兄是谁？ | 笔泰冲动

笔泰冲动

胡慧冲

2025-05-16 02:00 HKT

阅讀更多

生活专栏

內容

　　有留意我社交媒体应该会发觉，近几个月自己出镜经常会穿着某个独特造型人物嘅衫，甚至乎去澳门国际旅游博览都有唱一首新歌，歌名叫做《来吧，肥黑师兄》！

　　肥黑师兄系边位？其实系小弟去年忽发奇想而创作嘅一个人物，佢本身就系幪面超人世界入面嘅坏蛋战斗员「叽叽」，一生只系识得恰小朋友、伤害人类，因而被幪面超人教训一餐。某日叽叽开始怀疑人生，问自己「点解条命会咁苦？」于是乎决定到泰国去旅行散心。正所谓Amazing Thailand，来到泰国当地人又好，而且食好住好，结果叽叽由瘦仔变成肥仔。有一日佢去佛寺见到一位和尚，继而受到和尚感化，教佢以后要做个好人，带欢乐畀大家，仲帮佢起个法号——肥黑师兄。

　　故事大致就系咁，可以话系二次创作，我仲揾咗位泰国设计师帮手设计一系列图案。估唔到肯花钱先会有好成果，身边嘅泰国朋友同香港朋友都对创作成品表示欣赏。最初只不过谂住设计出来自己玩、自己着用，点知泰国朋友竟然觉得有商机，仲投资制成商品，而家喺泰国曼谷有一个商场有售，迟啲其他地方都会有，譬如下星期钻石山荷里活广场嘅泰国节，同埋下个月会展嘅香港国际旅游展，我都会攞有关商品返来卖，希望大家会欣赏。

　　经常讲呢啲小生意小创作唔会发达，胜在创作过程好开心，尤其是得到朋友支持。每年泰国节、旅游展都有唔少粉丝到来，希望今次除咗玩游戏赢取机票住宿之外，都会有人有兴趣支持一下，卖嘅唔系甚么贵价嘢，但从中可以得到好大满足感！人生在世，冇嘢开心得过呢种满足，等于自己节目嘅主题曲或插曲，偶尔有人同你讲「我识唱，唱几句你听吖！」作为一个非专业歌手，自己作嘅歌有人认识，真系无比欣慰！今次产品算多元化，有用来搽嘅「Go膏Let's膏」，亦都有T恤、布袋、丝巾、磁贴、匙扣等等，应有尽有。

胡慧冲