胡慧冲 - 一个品牌的诞生 | 笔泰冲动

胡慧冲

2024-09-13 02:00 HKT

阅讀更多

內容

　　话说在大约二十多年前，有一间来自泰国青迈的按摩店，在曼谷Ratchada路一间车行上面开了小型分店，正所谓兄弟同心，其利断金，此店一众老板都系亲戚朋友、兄弟姊妹，之后因为经营有方，而且服务等各方面都吸引到游客，所以分店越开越多，甚至乎成功冲出泰国，分店开到去其他国家（系争在香港仲未有）。呢间按摩店当年更首创四手按摩，成为拿手招牌菜，之后又不断转型，例如变身Spa店兼售卖相关产品，亦开设了医疗美容店，甚至专门针对运动等肌肉劳损的按摩店，实行多方面发展。

　　唔讲你唔知，作为一间泰国按摩店，佢哋竟然够胆开埋日式温泉！时至今日，喺泰国已有唔少日式温泉，当然包括佢哋呢间，由最初青迈，到后来曼谷甚至乎芭堤雅都有，规模越做越大。可能有人会觉得「傻的吗？」，泰国天气热得咁紧要，竟然大热天时浸温泉？你唔好理，芭堤雅分店早上10时开门，9时多已经有人排队。而佢哋其实仲涉足饮食业，于青迈、芭堤雅、曼谷都有开设餐厅。

　　今时今日，一班创业元老、兄弟姊妹已经翘埋双手，周游列国叹世界，将生意交畀子侄打理，仲成为上市公司，呢间就系香港人都好熟悉嘅Let's Relax。提到Let's Relax，网上总有人会话服务唔好、手势差云云，但事实上分店越开越多，亦不乏世界各地旅客同本地人帮衬。最新开设系位于较偏远社区Bang Na的一幢建筑物，里面既有按摩，亦有温泉及餐厅，主要服务对象正正系该区居民而非游客，皆因区内住咗唔少富户人家，对佢哋来讲，专登揸车出市区按摩未免太费时失事，采访当日便见唔少附近屋苑嘅富裕家庭来食饭。多年来此按摩店都算Keep到水准，亦不断精益求精，当然十只手指有长短，未必每位按摩师都顶瓜瓜，但起码质素有一定保证。

胡慧冲