古星辉 - 开展5.5G绿色合作计划 | 乜都5G
Hola（你好）！此文章见报时，于西班牙举行嘅国际科技界盛事世界流动通讯大会（MWC）刚闭幕。笔者很高兴周二（2月27日）喺巴塞隆拿，亲自见证公司与著名ICT基础设施和智能终端机供应商，就共同推动绿色流动通讯网络发展及探讨5.5G喺香港嘅创新应用，签订绿色发展合作备忘录。
分段采用AI节能方案
一般嚟讲，5G嘅耗电量比4G高大概7成，有数据预期喺5G元年至2030年的十年期间，耗电量将急升达160%。今年业界将迎来5.5G元年，全球都聚焦碳排放管理，以及加倍关注业务对气候变化所造成嘅影响。大家各出奇谋，希望能够透过采用绿色方案，例如储能、改用洁净能源等大幅节能减碳，并且喺专注环保之余，确保用户嘅优质体验不变。
今季开始我哋将会分阶段喺香港不同区域嘅基站，率先采用先进嘅人工智能（AI）节能方案，全天候管理及分析网络嘅使用情况。当网络喺低用量嘅时候，就会自动调节到智慧节能模式，预期喺有关方案全面商用后，公司每年可以减碳超过40万公斤，相等于由香港直飞巴塞隆拿约1000次、东京约2000次，又或者飞北京超过2600次的碳排放量。早前我哋已经喺新界东试行有关节能方案，预期今季会喺其他地区嘅基站全面应用。
另外喺繁忙地区，我哋亦试用咗环保智能天线以减低用电量。呢种高效能嘅天线，以「0 Bit 0 Watt」为节能目标，即系喺零数据传输嘅时候做到零耗电，从而将能源使用量减到最低。例如某地区喺凌晨冇咩人用网络嘅时候，天线就会进入「深层睡眠」状态，但当系统侦测到有用量，就会立即「叫醒」网络提供服务，悭电又唔会影响用户体验。早前有测试结果显示，设备喺休眠时候嘅电功率低于10瓦特，用电量仲少过灯胆。呢个方案更喺MWC嘅全球流动通讯大奖中，攞到「最佳流动技术突破奖」。
近年全球各地不时出现极端天气情况，大家都警觉到保护地球刻不容缓。我哋喺努力提供优质嘅通讯服务外，亦将竭尽所能推动可持续发展，以及关注业务对气候变化可能带来嘅影响，以MWC今年嘅主题「Future First」（以未来为先）为目标！
和记电讯香港执行董事及行政总裁
古星辉
