古星辉 - 5G宽频特别行动组|乜都5G

上文提到5G喺打造「智慧乡郊」发挥咗举足轻重嘅角色。今期同大家分享电讯商喺偏远地区拓展5G家居宽频嘅实例。

话说巿区有「街霸」推宽频上网,喺乡郊,我哋公司就有「5G特别行动组」,由资深销售同事组成,并由网络工程人员同客户服务部同事做支援,专攻乡镇5G宽频业务。

特别行动组喺香港嘅乡郊社区深耕细作,佢哋由开始认识村民,慢慢了解佢哋嘅需要,到实地勘察如何全面改善村落嘅网络基建同讯号覆盖,事事亲力亲为。
助乡郊村民脱离龟速上网

成员个个都善于沟通,又有耐性,好有心机为村民设计屋企嘅5G布局同智慧家居。我哋嘅特别行动组喺某条村嘅悉心服务,慢慢一传十,十传百,半年后全乡镇几百户,差不多一半都转咗用5G宽频,脱离龟速上网。同事话,最有成功感系可以帮到村民(特别系老友记)用到紧急服务,例如遥距视诊,仲可以同移咗民嘅「soon」仔倾吓偈。

我哋全力推动5G家居宽频,希望吸引更多家居客户升级;一家几口,试过5G嘅好处,自然会转用新科技。有人话5G仲未普及,系因为未有杀手级应用出现。其实5G家居宽频正正就系一个简单易用嘅方案,可以成功解决偏远地区上网又慢又贵又要拉线嘅问题,同光纤上网互补,令更多人可以高速上网,成就更多可能。

讲开5G家居宽频,一定要提吓个路由神器。呢种新款神器嘅接收讯号同发送Wi-Fi嘅威力,比手机强劲好多,仲支援双频700MHz及900MHz,可以充份发挥呢两段频谱穿透力强、覆盖广阔嘅优势。

踏入2023年,5G喺香港已推出差不多3年。要真正普及5G,我哋仍须努力。一方面,吸引更多个人用户升级至5G;另一方面,鼓励城中各行各业广泛采用5G应用方案,同时加强「智慧乡郊」嘅发展,如此,香港距离成为国际智慧城市嘅日子还会远吗?
和记电讯香港行政总裁
古星辉
更多文章