古星辉 - 5G智慧乡郊｜乜都5G

古星辉

2022-12-30 00:00 HKT

阅讀更多

內容

在追求乐活的世代，愈来愈多人喜欢住喺乡郊，因为空气清新啲、空间多一啲、私隐度亦高啲。随著科技发展，特别系5G日渐普及，亦为乡郊注入动力，进一步拉近城乡嘅距离，亦有助提升偏远地区居民嘅生活质素。

全港约有700条村落，政府于2020年底推出「智慧城市蓝图2.0」，提出「智慧乡郊」嘅愿景，期望藉科技促进乡郊数码化，以改善民生。其实好多乡村因为无光纤覆盖，住户喺通讯上网方面，一直遇到不少困难。及至5G推出，加上电讯商近年大力于乡郊及低密度住宅区推广5G宽频；免掘路、免拉线，用户可即插即上网！

以5G提升村落嘅流动网络覆盖快而准，无论系为家居住户提供5G宽频服务，定系促进乡郊社区发展，都有助打造「智慧乡郊」。
5G神器上网唔怕山旮旯

喺疫情及新常态下，流动通讯愈见重要。上网已并非打机、睇片、理财咁简单，无论遥距工作、上堂，甚至病咗要视像诊症，都要有高速流畅嘅网络连接。喺偏远地区用5G宽频，可谓无懈可击。特别系今年开通咗700MHz频段，即使喺山旮旯地方，只要配合5G神器（即先进路由器），就可瞬间上网。

另外，结合咗其他先进技术嘅5G应用方案，喺建构乡郊社区方面亦好有帮助。例如喺5G交通、5G医疗或5G环境监察等范畴，只要应用合适嘅5G方案，就可以畀居民既享有郊外清幽嘅生活环境，兼享市区生活嘅便利。

正所谓「民生无小事」，喺政府牵头嘅「智慧乡村先导计划」下，就见到唔少科技便利民生嘅例子，例如以先进科技监察树木倒塌嘅情况，以人工智能及机械人方案，侦测山火、水浸、以至非法倾倒泥头／垃圾，以及有无野生动物出没等。简单如在沙螺洞、荔枝窝等郊野建设智能洗手间，亦有助便利民生，加快「智慧乡郊」嘅发展。

2023年将至，祝大家新年进步！
和记电讯香港行政总裁
古星辉