古星辉 - MHz频谱启动5G新篇章｜乜都5G

古星辉

2022-07-08 00:00 HKT

阅讀更多

內容

记得六月中曾经预告过700MHz 5G频谱准备就绪，同事亦已经完成有关部署。转眼间6月底就收到有关当局嘅正式通知，营办商喺6月30日可以逐步启动700MHz 5G频谱。全靠同事早已完成部署工作，我哋喺6月30日零时零分准时启动700MHz 5G频谱，成为首间启动呢段新频谱嘅电讯商，赶及庆祝香港回归25周年，当晚喺网络控制中心同啲工程团队一齐见证住呢个启动时刻，大家心情相当兴奋，希望藉住呢个穿透力特强嘅新频谱，为香港5G服务揭开新篇章。

之前提过呢段频谱嘅好处系穿透力强，即使前面有座山都未必可以挡得住，换句话说营办商可以打造广域同具深度嘅覆盖，有利推广5G宽频及其他商业应用，对发展智慧城市相当重要。

呢个新频谱，除了有助提供广域覆盖，营办商仲可以配合载波聚合（Carrier Aggregation）及动态频谱共享技术（Dynamic Spectrum Sharing），喺特定嘅场景下，最佳下载速度表现可以倍升，将手上频谱发挥最大效益。
科技网站实测下载快近3倍

日前有科技网站去咗粉岭测试700MHz嘅5G服务，根据有关测试资料，喺有700MHz嘅情况下，下载速度比以前相差3倍！亦都有住喺低密度住宅嘅朋友同我讲，有咗700MHz 5G服务，喺屋企厕所同阁楼都收到电话，亲身体验到深度覆盖带嚟嘅好处。

有一点大家要留意，呢段频谱前身系用嚟提供模拟制式电视广播，当转换成提供流动通讯服务嘅时候，电视天线系统有可能仲会接收到呢个频谱嘅讯号，如果天线系统系位于流动通讯基站附近嘅话，流动网络嘅讯号有可能影响咗电视接收。假如各位发觉呢两个星期电视接收有问题嘅话，就有机会系呢个问题，可能要揾师傅喺电视天线加装一个滤波器喇。
和记电讯香港行政总裁
古星辉