古星辉 - 游住船河叹5G｜乜都5G

乜都5G

古星辉

2022-06-17 00:00 HKT

阅讀更多

产经专栏

內容

炎炎夏日，又系出海嘅好时机，对住无敌海景吹吹海风，少不免心血来潮想打卡开Live，去开游船河嘅人都知，去到大海中心讯号通常唔多稳定，不过唔使等好耐，大家就可以游住船河打卡睇片。

呢个其实系物理问题，现时4G同5G所用嘅频谱主要属于中高频，频段愈高穿透力愈低，喺市区应用问题不大，但到咗距离基站较远或附近较多山岭嘅范围，讯号就会冇咁完美。如果要为广阔嘅区域提供深度覆盖，除咗密密加建基站之外，低频段嘅频谱亦相当重要。

政府早年已提出数码红利，即系停止传统模拟电视广播服务，腾出频谱作流动通讯用途，而传统模拟广播所用嘅，正正就系700MHz呢段比现有4G同5G更要低频嘅频谱，呢段低频频谱喺去年10月已经完成竞投，随住模拟电视广播喺旧年12月正式结束，亦象征好快可以交到营办商手上用嚟做5G服务，而业界传闻预期最快喺本月底就会指配至成功竞投嘅营办商，我哋上星期更抢先公布完成700MHz 5G频谱嘅部署。
讯号范围达离岸11公里

根据工程部同事嘅测试资料所得，700MHz频谱提供到极具深度嘅5G覆盖，初步测试与基站相隔远至离岸11公里嘅范围都可以收到讯号，例如南丫岛深湾及西贡对出一带海域，呢啲平日被山岭遮挡讯号嘅地方，凭住低频穿透力特强，好快就可以接收到5G讯号，届时喺呢啲位置出海上网就再唔使烦，游住船河叹5G不是梦。

既然700MHz频谱可以提升5G覆盖嘅深度，对一啲低密度住宅区嘅5G接收好有帮助，例如新界西北、中半山同九龙塘等。对于呢啲住户，佢哋唔使再忍受又贵又慢嘅龟速宽频，可以多一个更高速方便嘅选择。覆盖以外，多一个5G新频谱嘅好处系营办商可以将手上嘅5G频谱，透过载波聚合夹埋一齐使用，提供更高速嘅服务，发挥频谱最大效益。

同事话依家同供应商忙于测试支援载波聚合技术嘅5G Router，睇嚟唔使好耐就有得用喇。
和记电讯香港执行董事及行政总裁
古星辉