古星辉 - 5G与NFT和元宇宙互利共生｜乜都5G

乜都5G

古星辉

2022-05-20 00:00 HKT

阅讀更多

产经专栏

內容

「JUMPSTARTER 2022环球创业比赛」上周喺K11 MUSEA举办「创科盛典」活动，包罗多个艺术讲座、NFT展览同「花吹雪」大型沉浸式体验。笔者就同日本知名数码艺术家山下晶子出席其中一节艺术讲座，讨论NFT对艺术发展嘅影响，讲吓NFT系咪已经改变咗艺术嘅概念，对电讯业嘅意义，以及5G喺元宇宙嘅角色等。

环球对NFT嘅关注程度，从网上嘅搜寻次数可以略知一二。根据Google Trend统计，NFT呢个字嘅搜寻次数由去年五月起一直上升，今年一月中更是最受关注嘅时期。众所周知，NFT同元宇宙都系Web 3.0嘅一部份，而5G可以话系元宇宙嘅基础，电讯商如何受惠于NFT同元宇宙，做到互利共生，可从两方面探讨。

其一是由BSC做起，呢个BSC唔系大家熟识嘅Bachelor of Science，而系Bandwidth（频宽）、Storage（储存）同 Computing（电脑运算）。喺BSC背后嘅其中一个强大后盾就系5G。其超高速、低时延、万物互连嘅优势，支援各款AR、VR穿戴装置，随时连接元宇宙的虚拟网络同现实世界。

电讯商无论喺元宇宙或者现实，主要照顾两批客户，包括企业客户同大众客户，为佢哋提供所需技术。一方面要让大众客户进入元宇宙嘅广阔空间消费、消闲同娱乐；另一方面协助企业客户于元宇宙拓展业务，例如建构虚拟商店，引入不同应用，促进虚拟和现实嘅互动。

其二是提高市民大众对NFT和元宇宙的认识。目前NFT及元宇宙主要以数码艺术、零售和电子游戏为切入点，要推广呢啲新概念，电讯商扮演重要角色。例如有电讯商已率先将加密货币应用于营运层面，容许客户以加密货币交月费同买电讯产品，开启咗元宇宙嘅收费平台。
研推广活动送加密货币

另外，大家都可能有参与过唔同公司嘅推广活动，赢吓电子礼券或者储吓积分。其实，有电讯商已经研究紧未来喺推广活动送加密货币，以取代礼券同积分，等啲客慢慢习惯巿场新趋势。

当然，要提高市民大众对NFT同元宇宙嘅认识，电讯商或者大型企业亦可以行多一步，例如好似我哋咁借出门巿部份地方，变身艺廊，等年轻艺术家可以搞数码艺术展览同比赛，并将佢哋嘅作品免费铸造为NFT。

总括而言，NFT同元宇宙不但赋予数码艺术新意义，亦为电讯商带来无限商机。
和记电讯香港执行董事及行政总裁
古星辉