【頭條獨家】「隱世廚神」中秋節煮十道菜黎耀祥教你做節煮海鮮秘技

即時娛樂

更新時間：22:54 2020-10-08 HKT
發佈時間：22:29 2020-10-08 HKT

黎耀祥於中秋節煮咗十道菜，黎太好有口福。

「視帝」黎耀祥原來係「隱世廚神」，每年嘅開年飯都由他主理，喺剛過去嘅中秋節，受限聚令影響只好留家同家人飯聚，黎耀祥由買餸到落廚，一腳踼煮十人飯，人人激讚好味道。祥仔分享大時大節買餸心得：「只要動動腦筋，就算係煮海鮮都可以提前一日買定食材，咁就唔使同人迫，又可以買平啲。」採訪：方騫平攝影：譚壹致場地：培仔海鮮@奶路臣街、阿一海景飯店

祥仔煮緊韓式炆牛仔骨，隔離爐就煲緊靚湯。

呢個清酒牛油炒鮑魚，隔住張相都流口水。

喺中秋節前一日，黎耀祥同太太Julia帶埋《頭條日報》記者直擊他選購海鮮情況，兩公婆相當有默契，黎太負責睇車，由「老細」黎耀祥自備冰袋出擊，由於祥仔係熟客，老闆好識做咁按他需要執啲正嘢，好似鮑魚、大花蟹、花螺、皇帝斑及墨魚膠等，仲自動自覺打折，祥仔逗留唔使十分鐘就閃得。

祥仔好權威咁發表下廚心得：「正日買餸，尤其海鮮一定貴好多，有啲嘢可以整定先，新鮮魚、蝦急凍一日冇問題，雪暈花蟹後，預早蒸好做凍蟹；花螺就用辣酒煮，做定仲入味。」正日當日早上11點，祥仔開始動手，仲加碼煲埋蓮子茨實淮山花膠竹維雞靚湯、蒸雞、韓式炆牛仔骨、冬菇花膠煲、清酒牛油炒鮑魚等共十道菜。問祥仔可有興趣做烹飪節目？祥仔拒絕：「又唔得！我呢啲只係煮家常便飯，唔通炒碟菜都教人咩！之前請過鄭嘉穎夫婦嚟食飯，嘉穎鍾意食香口嘢，我整咗阿媽教落嘅蔥蝦煎蛋角、蒸條魚，佢就食咗三碗飯，我諗只係啲餸好餸飯啫。」