林作開癲價$57,000賣拳賽「汗味短褲」 計劃周末搞拍賣live
更新時間：18:07 2021-10-07 HKT
發佈時間：09:00 2021-10-07 HKT
發佈時間：09:00 2021-10-07 HKT
字體大小
林作喺社交網拍片，話因為拳賽原本應有嘅100萬拳酬，當中有近$57,000用咗嚟購買門票。佢話：「由於食水太深，本人決定將當晚作為英勇外賣仔所著嘅、印有我暱稱 Jolam 嘅拳賽短褲拍賣，作價57,000元，以圓本人實收100萬拳酬嘅心願。買嚟著住訓覺又得，搞嘢都得，得咗！」
可能大家都覺得佢瘋瘋癲癲，仲以為佢會被網民習慣性問候，點知只有一位網民用粗口留言，其他網友都話支持同有興趣買。林作仲向《頭條娛樂》透露有好多人出價，佢話：「有呀，甚至海外嘅人出價，有幾個人都認真傾緊，但個額大，所以未有人真係落訂，暫時未有人滿足到我，所以打算今個周末進行一個網上拍賣，價高者我就會賣咗佢。」林作仲話條褲從來冇洗過，完全係真空處理，並繼續賣褲讚褲香：「如果將來我名成利就，就更價值連成，絕對物有所值。」會唔會搭單送埋裕美私伙冇洗褲？佢話：「佢唔肯賣，我又攞唔到佢啲嘢賣，我就覺我呢條最值錢。」
