余慕蓮與家燕姐慶中秋生命力驚人希望玩多幾年

更新時間：13:44 2021-09-21 HKT
發佈時間：13:00 2021-09-21 HKT

魚毛一見家燕姐表現相興奮，兩人緊握着對方的手。

余慕蓮（魚毛）去年底因為肺纖維化入院，其間檢出患上血液炎，一度入住深切治療部，可謂半隻腳踏入鬼門關，幸好經過半年治療，最終康復出院，在今年4月回家休養身體。在中秋節的前夕，TVB的《東張西望》專登找來家燕姐及安德尊等好友與魚毛去酒樓食午飯相聚過節，片段於昨晚播。

魚毛一見家燕姐表現相興奮，兩人緊握着對方的手，一坐低便傾過不停！魚毛的精神不錯，雖然聲音有點嘶啞，但依然中氣十足，而且她已經不用再坐輪椅出入，只需使用助行架就可以行到，她還說：「希望之後連呢個架都唔使用，只用柺枚就可以。」家燕姐亦讚她很有生命力，魚毛說：「我想玩多幾年…..我好感恩，因為啲人話我入ICU嗰度，十個入去九個都唔出得嚟，我肺纖，我而家每幾個月就要打標靶藥，幾千蚊一次。」安德尊亦有現身，他一見魚毛就上前擁抱，魚毛笑說：「一陣又上封面喇！」

一坐低便傾過不停！

大王見到魚毛當然要攬攬！

見到朋友當然份外開心！

魚毛可以進食正常食物！

因為魚毛住院時要插喉，喉嚨的傷口仍清晰可見，其後一度只可進食流質的食物，幸好目前魚毛已經恢復過來，可以如常進食：「之前睇住人食嘢，流口水，自己又冇得食，樣樣都唔食得，嗰陣喺醫院時食嘢又要剪碎晒，水又要落凝固劑，因為驚我飲水濁親。」家燕姐表示：「佢係根本食唔到嘢，佢係想喊呀！第一啲人又唔可以嚟探佢，因為疫情，後來知道佢慢慢食到嘢，吞到嘢都因為佢自己練，佢好肯去練，真係好積極人生，好樂觀。」余毛即說：「因為我想做番一個正常嘅人。」她更謂當時要用尿片，躺到背脊都爛，屁股又生瘡，以為要死了，幸好最後死過翻生。不過余毛邊食邊傾，食乳鴿的時候突然咳起來，嚇得同桌的人叫她慢慢食，幸好最後有驚無險，唞順條氣就沒事，現場不少茶客上前向她慰問，以及祝她中秋節快樂。