【頭條獨家】婚禮曝光山聰定欣做MC 袁偉豪唱情歌冧爆張寶兒

更新時間：17:19 2020-11-25 HKT
發佈時間：19:14 2020-11-24 HKT

新娘子雙手戴滿3對龍鳳鈪，頸就掛4對。

今日，39歲袁偉豪(Ben)與拍拖三年的29歲女友張寶兒（Bowie）結婚，因為疫情影響，兩人冇大搞婚禮，選擇在7000萬西貢豪宅的會所舉行儀式。出席圈中人有周柏豪、單立文、樂小姐及黃長興，喺限聚令下，現場只招待100位賓客見證一對新人簽字結婚，部份來自爸爸生意上嘅貴賓朋友，仲帶同名貴包包做賀禮，一對新人回送甜點小禮物。

謝東閔和林子善擔任兄弟團，姊妹團有朱智賢，而張寶兒的妹妹張寶欣則做伴娘，胡定欣及陳山聰做主持。儀式開始前有警察到場，查證有否違反限聚令。另外一對新人都有跟足中國傳統婚嫁儀式，二人齊穿中式裙褂禮服進行傳統儀式，新娘子雙手戴滿3對金光閃閃巨型龍鳳鈪，頸都有掛4對龍鳳鈪，嫁得相當豪。

袁偉豪跟足中國傳統婚嫁儀式。

謝東閔和林子善擔任兄弟團。

婚禮於豪宅會所舉行，上層設相展，放有一對新人的甜蜜拍拖照及婚照，會上提供Cocktail及小食，知情者說:「好多賓客都唔太想除口罩，所以唔係好多人有食嘢。」婚禮儀式原定於3點半開始，但延至近5點先正式簽紙註冊，一對新人先致辭，袁偉豪表現得比較冷靜，特別多謝不斷畀機會佢嘅樂小姐，冇樂小姐冇今日，又多謝《打工捱世界》嘅製作組，因為節目令佢認識張寶兒。之後輪到張寶兒，佢多謝父母時忍唔住喊。最後袁偉豪唱情歌冧老婆，包括唱《When i fall in love》及處男歌《你與你的另一半》。」據知《你與你的另一半》由張寶兒填詞，由Ben作曲及主唱，亦是求婚歌，對兩人別具意義。

簽紙儀式順利完成後，一對新人於傍晚6時許接受訪問，新娘Bowie穿上自己設計的大露背和腰側透視婚紗，配襯張母送贈的閃鑽頸鏈，Ben錫完老婆之後笑言：「以後可以隨便錫！」二人透露婚禮沒玩新郎環節，主要向長輩斟茶，中午才開始儀式，Ben坦言婚禮是戰戰兢兢下完成，自己第一個喊，Bowie也笑言未見過他這樣，爆老公讀誓詞臨時加插深情說話，亦有唱講述二人感情的新歌。

婚禮場地外有警察查證有否違反限聚令。

張寶兒臨入會場前和姊妹朱智賢影合照。

Ben談到三年前在非洲大草原認識Bowie，過去三年得到女方的包容和縱容他的任性，也是事業的春天，所以好開心，現時需要定下來所以娶老婆。Bowie撐老公不算任性，只是買些玩具圓兒時夢想。

二人坦言為限聚令非常頭痛，一直沒打算大搞， Ben亦知現場發生插曲，有警員到場但處理了，二人盡量減低來賓人數，現場防疫用品都準備充足，提醒來賓要戴口罩，讓大家在安全環境下觀禮。兩人表示今年搞唔到婚宴，望明年疫情結束後大家可以狂歡一晚。

問到愛巢是否即日入伙，Ben表示要先執拾，因為床上有好多好意頭物品，例如外母擺放寓意抱孫的BB鞋仔。談到「造人」大計，Bowie笑言婚紗貼身一睇就知她無大肚，又表示享受現時生活和工作亦不趕生B，Ben也支持她繼續工作，笑言除非有意外，但家長就好想抱孫，Bowie透露明天已經要開工。