合唱4度嗌停　楊千嬅開騷跳掣喪笑　梁漢文：佢就嚟瀨尿啦！

更新時間：19:50 2017-04-29 HKT
發佈時間：12:02 2017-04-29 HKT

終於唱到《滾》

電影《春嬌救志明》票房節節上升，香港上畫兩日累積票房超過360萬港元，在內地昨日開畫票房突破4615萬元人民幣。昨晚楊千嬅在廣州舉行「突然想起余春嬌唱游會」，得知票房成績一飛衝天，開心到與嘉賓梁漢文（Edmond）合唱時4度喪笑嗌停，搞到Edmond一度懷疑自己上了整蠱節目。

陳逸寧、千嬅、林兆霞又唱又跳《傳說》。

千嬅見證粉絲求婚成功。

千嬅化身余春嬌獻唱多首電影系列出現過的經典歌，《最後的玫瑰》、《當我想起你》、《動地驚天愛戀過》和《突然好想你》等，更與電影中的好姊妹「Brenda」林兆霞和「Isabel」陳逸寧組成MKB48又唱又跳《傳說》，陳逸寧自爆參考大媽廣場舞，全煬high爆！
特別嘉賓梁漢文（Edmond）與千嬅合唱時笑料百出，話說Edmond與千嬅合唱吵架歌《滾》，他叫千嬅一齊培養情緒，音樂準備響起，千嬅突然說：「其實我哋真係幾勁……」Edmond被擾亂情緒，千嬅即道歉轉個臉向觀眾說：「人哋唱情歌唱到開巷，我哋鬧交鬧到開巷，係咪勁先？！」觀眾起哄大笑，情緒平伏後再唱，千嬅卻唱錯另一段歌詞，耍冧重唱。點知千嬅似被篤中笑穴，笑到標晒眼水。Edmond刻意拉開話題希望千嬅盡快平伏笑意，但她卻笑到踎在地上，Edmond無奈地對觀眾說：「你哋唔好再引佢笑，佢就嚟瀨尿㗎啦！」音樂又再響起，千嬅又叫停：「到我未得呀！」Edmond反白眼：「其實係咪整蠱節目？你哋夾埋整蠱我？」幸好最後亦順利完成合唱。
電影票房報捷，音樂會亦喜上加喜，有男Fans以千嬅的歌曲向女友求婚，他拿出戒指單膝跪在台上說：「今日喺你我偶像楊千嬅面前向你許下承諾，希望與你愛在旁若無人的太空。你願意打救我，做我嘅余春嬌嗎？」女友感動答應，千嬅起哄叫「親一個」，並祝福二人白頭到老，永結同心。