小儀忙過辭職前 陪父母飲茶期票未兌現 經營YouTube頻道唔想出賣朋友
發佈時間：17:45 2025-11-14 HKT
阮小儀今日（14日）到青衣出席煮食產品發佈會，示範燉燕窩，小儀指年輕時媽媽經常燉燕窩給她，「想谷靚我」，笑稱只有靚，對高度沒有幫助。
小儀收入大減換快樂
離開商台後，小儀工作不斷，她感激客戶支持，笑指外界知道她沒有正職後，生活困難，故給予工作幫補「開飯」，問到酬勞是否夠食九大簋？小儀指可以用平民的材料去煮；同時表示︰「出嚟闖之後，唔想畀自己太多壓力！我好想唞，想多番啲自己時間，但呢個月，估唔到比以前仲多咗工作，盡做！之後會多番啲時間，我仲未陪爸爸媽媽飲茶，佢哋話『得啦，我哋OK！』佢哋好生性，識得自己照顧自己。」小儀真心認為自己幸運，父母也支持她，至於是否覺得太遲離開商台？她說：「又唔係，永遠覺得我係啱時間走，啱啱做咗30年，呢段時間走，係自己生日月份入面，好好放鬆一下，好好enjoy自己嘅生日，我真係咁純粹。可能好多人話我蠢，應該做埋新年攞埋雙糧先。」
小儀指現時收入未至於「當年好紅時嘅雙倍」，全盛時期的她，又做主持又拍劇兼拍綜藝節目，每天凌晨三、四點才回家，第二日行程一模一樣，「我記得當時化妝間郭晉安見到我，同我講︰『你覺唔覺得而家自己個人係灰色？』佢話我面色唔同晒，要留意一下，唞吓。另一個係陳豪，陳豪我就喺停車場見到佢，都係咁講。」她形容，覺得當時機不可失，「自己人生未試過去到咁高峰，拍《愛情食物鏈》又做主角。」
小儀考慮約陳豪沖啡
小儀續稱，過去辛苦搵錢的日子經已過去，現在不需要太搏命，早已對自己有所交代。提到她可在個人網上頻道找一些好朋友受訪，小儀稱沒有去想，她不希望把好朋友與工作掛勾。提議她可與好友一起煮餸？小儀則指可以考慮，例如找王菀之，陳豪就沖咖啡，「可以合作嘅人真係好多，我懶，又好隨性，我唔想逼自己，有壓力下未必做到好嘢，而家開開心心做嗰陣，人哋好支持我，（第一條片有20萬點擊！）所以我更加學到一課︰唔好強求！過往有強求，希望做好啲，而家發覺放鬆去做，我又快樂，人哋又睇得快樂，呢個係我30年裏面學返嚟。」直言現在是收成期，要慢活去感受世界上的美好。
小儀補充，試過在等過馬路時，有人叫她加油，她感覺窩心，「可能過往我畀咗啲加油嘅時刻佢哋？而家撓埋手，等佢哋同我加油。我有座右銘，成日都會提醒自己，就係要保持一夥善良嘅心，世界回報畀你嘅嘢，都係善良嘅。」
